16.2.05

abaixo o esencialismo


Loupier é skin antifa e fillo de emigrantes limiaos en París. Fala alternando o verlan co mesmo galego que falaban os seus bisavós. Combino con el na estación de metro de Avron para pasarmos polo local parisiense da CNT, e cando aparece trae consigo dous rapadiños máis, duns 17 anos, que andaban á busca do local: esa noite hai concerto de OpcióK95, un dos máximos expoñentes de Oi! catalán, e a expectación é moita.
Chegamos ao local e todo está cheo de skinetes de punta en branco. Beben cervexa, saúdanse cerimoniosamente con bicos nas meixelas e sorpréndeme ver o código coidadísimo e elaboradísimo da súa indumentaria: a paixón polas marcas chegou ao street punk da man da working class máis concienciada.
Loupier fálame do complicado que é ser red-skin, polas confusións que pode haber cos skins neonazis, e aclárame que a CNT-París ten malas relacións co resto da CNT por organizar concertos coma o desa noite: os rapados en Cataluña tenden a ser marxistas, e iso é unha afronta grave para un auténtico anarca.
Como aínda falta tempo para o concerto imos tomar unhas cervexas ao bar do lado e alí coincidimos cos músicos de OpcióK95. Veñen de Barcelona e a composición do grupo non podía ser outra: hai tres cataláns, un andaluz e un quinto compoñente con quen boto falando un bo anaco.

É galego, moreniño, guitarrista, e chámase (sic) Omar Alaui.

6 comentários:

Anónimo disse...

Esqueces que Omar é bastante guapiño, tamén. Sempre me gustou e sempre llo dixen (shame on me!), pero é que a min os heteros...

Henri

Plattdorf disse...

É guapiño, é.
Pero non llo dixen, porque é que a min os heteros...
:-)

Cesare disse...

A ver, a ver, que pasa aquí???
Todo dios coñece o tal Omar? Acaba a noite así? Que pasa?
A min isto non me chega a nada.

(gústame ver como renegan do esencialismo, por unha vez...)

Anónimo disse...

Claro que coñezo a Omar. Sorpredido? Como dicimos en Vigo, 'yo muevo peña, pavo'.

Henri

Cesare disse...

Pois si, sorpréndeme, si.

Plattdorf disse...

"(gústame ver como renegan do esencialismo, por unha vez...)"

Maldito presuntuoso...